Марына Вікенцьеўна Лобач нарадзілася ў горадзе Смалявічы Мінскай вобласці.
Спортам Марына пачала займацца з 7 гадоў. Першым трэнерам будучай алімпійскай чэмпіёнкі стала Ірына Ляпарская. Пасля таго, як Марына асвоіла асновы гімнастыкі, трэніраваць юную спартсменку ўзялася Галіна Крыленка.
Тройчы Марына заваёўвала Кубак СССР (1985,1987,1988), у 1986 годзе стала срэбным прызёрам Гульняў добрай волі.
На Чэмпіянаце свету 1985 года ў Вальядолідзе (Іспанія) яна заваявала срэбны медаль, а ў 1987 годзе ў Варне - два бронзавыя медалі і адзін залаты.
У Чэмпіянаце Еўропы 1986 года ў Фларэнцыі Марына заваявала бронзавы медаль, а ў 1988 годзе ў Хельсінкі - адзін бронзавы і два залатыя.
Але галоўнае дасягненне ў кар'еры беларускай спартсменкі - залаты медаль Алімпійскіх Гульняў 1988 года ў Сеўле. Марына Лобач стала першай савецкай алімпійскай чэмпіёнкай па мастацкай гімнастыцы.
У 1991 годзе Марына Лобач скончыла Беларускі дзяржаўны інстытут фізічнай культуры па спецыяльнасці "Трэнер-выкладчык фізічнай культуры і спорту". З 1991 па 1993 год - дзяржаўны трэнер па мастацкай гімнастыцы, з 1993 па 1994 - трэнер-выкладчык і харэограф па мастацкай гімнастыцы Рэспубліканскага вучылішча алімпійскага рэзерву, з 1994 - начальнік упраўлення аздараўленчых цэнтраў Прадстаўніцтва НАК Беларусі ў Мінскай вобласці, а з 2008 - трэнер-выкладчык установы "Рэспубліканскі цэнтр алімпійскай падрыхтоўкі па гімнастыцы мастацкай".
У выканкаме Нацыянальнага алімпійскага камітэта Беларусі Марына Вікенцьеўна ўваходзіць у склад пастаяннай камісіі "Жанчыны і спорт".
Марына Лобач - Заслужаны майстар спорту.
Больш дзесяці гадоў запар у Беларусі праводзіцца Міжнародны турнір БФСТ "Дынама" па мастацкай гімнастыцы на прызы алімпійскай чэмпіёнкі Марыны Лобач.
