Аляксандра Віктараўна Герасіменя нарадзілася ў Мінску.
Па прызнанні Аляксандры ў адным з інтэрв'ю, да фізічнай культуры яе прывучыў бацька - Віктар Іванавіч, які ў маладыя гады ўваходзіў у зборную СССР па лёгкай атлетыцы. Дарэчы, мама будучай чэмпіёнкі - Аксана Мікалаеўна - майстар спорту па спартыўнаму пяціборству, трэнер па плаванні.
Плаваннем Аляксандра пачала займацца ў школьныя гады - з чацвёртага класа.
На Чэмпіянаце Еўропы па плаванні на кароткай вадзе (спаборніцтвы праводзяцца ў 25-мятровым басейне) 2002 года ў Рыесе беларуская плыўчыха заваявала дзве срэбныя ўзнагароды ў вольным стылі: 50 м і ў эстафеце 4x50 м. У 2005 годзе яна стала бронзавай прызёркай у плаванні на спіне на дыстанцыі 50 м - у гэтым жа відзе ў 2009 годзе ў Стамбуле Аляксандра была другой, а на дыстанцыі 100 м - трэцяй. 2012 год прынёс нашай спартсменцы залатую (50 м) і бронзавую (эстафета 4x50 м) узнагароды ў вольным стылі.
На Чэмпіянаце Еўропы па водных відам спорту 2002 года ў Берліне (спаборніцтвы праводзяцца ў 50-мятровым басейне) яна ўзяла дзве "бронзы" у плаванні на дыстанцыі 50 м на спіне і ў вольным стылі. У 2006 годзе ў Будапешце Аляксандра стала срэбным прызёрам у плаванні на спіне на дыстанцыі 50 м - у гэтам жа відзе ў 2010 году яна атрымала перамогу, а таксама была другой ў 100 м вольным стылем.
Першае "срэбра" сусветнага першынства было заваявана ў Мельбурне, дзе ў 2007 годзе праходзіў Чэмпіянат свету па водных відам спорту, а "золата" на 100 м вольным стылем Аляксандра прывезла з Шанхая ў 2011 годзе. Медаль вышэйшай вартасці (100 м вольным стылем) упрыгожыў беларускую спартсменку сёлета і на спаборніцтвах у Стамбуле - на 11-ым Чэмпіянаце свету па плаванні на кароткай вадзе.
Аляксандра - удзельніца дзвюх Алімпіяд. У 2008 годзе ў Пекіне яна выйшла ў паўфінал на дыстанцыі 100 м у вольным стылі, а таксама заняла 8 месца ў гэтым жа відзе плавання, але на 50 м. У 2012 годзе ў Лондане гэтыя ж дыстанцыі прынеслі Аляксандры два срэбныя медалі.
Аляксандра скончыла Беларускі дзяржаўны ўніверсітэт фізічнай культуры па спецыяльнасці "Трэнер-выкладчык па плаванні", зараз атрымлівае другую вышэйшую адукацыю ў Беларускім дзяржаўным эканамічным універсітэце.