Мужчынскія конкурсы прыгажосці для Беларусі вялікая рэдкасць. Напэўна, таму лік удзельнікаў "Містэр Гомель 2013" не перавысіў дзесяці, а прасторная зала Гарадскога цэнтра культуры не дачакалася аншлагу.
У барацьбу за тытул самага прыгожага гамяльчаніна ўступілі: супрацоўнік "Гомельгражданпраект" Арцём Якубенка (№1); студэнты Гомельскага медуніверсітэта: Максім Ярашэвіч (№2), Канстанцін Мурашка (№3) і Вадзім Сідараў (№8); студэнт Гомельскага тэхнічнага ўніверсітэта імя П.В.Сухога Дзмітрый Яўменаў (№4); вольны мастак Дзмітрый Костачка (№5); студэнт Гомельскага дзяржуніверсітэта імя Ф.Скарыны Павел Міхно (№6); навучэнец Гомельскага каледжа мастацтваў імя Н.Ф.Сакалоўскага Уладзіслаў Халько (№7); будучы стыліст Сяргей Дземянюк (№9) і выкладчык Яўген Сцішанок (№10).
Хлопцы прадэманстравалі трыкатаж беларускага вытворцы "Westerly", італьянскае адзенне "Carrera jeans" і аўтарскую калекцыю касцюмаў дызайнера ААТ "Камінтэрн" Алены Шыловіч. Падтрымку ўдзельнікам конкурсу аказвалі дзяўчаты — мужчынскія дэфіле "разбаўляліся" жаночымі.
Таксама канкурсанты адказвалі на немудрагелістыя пытанні вядучых вечара. Напрыклад, чым пасатыжы адрозніваюцца ад пласкагубцаў, а таксама што такое легінсы і клатч.
Акрамя таго, рабяты прадэманстравалі гледачам свае харэаграфічныя дадзеныя.
Нажаль, дзяўчаты з груп падтрымак некаторых удзельнікаў конкурсу, так і не ўбачылі дэфіле сваіх любімчыкаў у плаўках (між тым праход у купальніках — абавязковая частка самых аўтарытэтных жаночых конкурсаў прыгажосці!).
Пасля працяглага антракта гледачы даведаліся імя самага прыгожага гамяльчаніна. Тытул "Містэр Гомель 2013" атрымаў 18-гадовы Павел Міхно.
